తమిళనాడులో ఘోర ప్రమాదం చోటుచేసుకుంది. వేగంగా దూసుకొచ్చిన లారీ ఓ కారును ఢీకొనడంతో అందులో ప్రయాణిస్తోన్న ఐదుగురు విద్యార్థులు దుర్మరణం చెందారు. మరో ఇద్దరు తీవ్రంగా గాయపడ్డారు. ఈ ఘటన తమిళనాడు తిరువణ్ణామలైలో జరిగింది. చెన్నై ఎస్‌ఆర్‌ఎంలో బీటెక్ చదువుతోన్న ఏడుగురు తెలుగు విద్యార్థులు కారులో అరుణాచలం దర్శనానికి వెళ్లుతున్న సమయంలో ఈ ప్రమాదం జరిగింది.
ఈ ప్రమాదంలో ప్రొద్దుటూరుకు చెందిన నితీష్, తిరుపతికి చెందిన యుగేశ్, ప్రకాశం జిల్లాకు చెందిన చైతన్య, నెల్లూరుకు చెందిన విష్ణు, విజయవాడవాసి బన్ను సతీష్, కర్నూలు నివాసి రామ్మోహన్ చనిపోయారు. గాయపడిన మరో ఇద్దరు విద్యార్ధులను పోలీసులు సమీపంలోని ఆసుపత్రికి తరలించారు.
తిరువణ్ణామలై కనకమ్మసత్రం సమీపంలో అతి వేగంగా వచ్చిన లారీ కారును ఢీకొట్టినట్లు పోలీసులు చెబుతున్నారు. ఈ ప్రమాదంలో కారు నుజ్జునుజ్జైంది. కారులో ఇరుక్కుపోయిన వారిని తీసేందుకు పోలీసులు శ్రమించాల్సి వచ్చింది. పోలీసులు కేసు నమోదు చేసి దర్యాప్తు చేస్తున్నారు.
